“غريب هو ذلك العالم المتشابك الكامن تحت فروة رأسى .. أبدًا لن أتمكن من فهم ذلك الكائن الذى هو أنا”
عمرك ما هتفهمه للأسف، بس ممكن تعرف تراقبه .. علم النفس مش كل فِكره انه يتكلم عن الأمراض النفسية، لكن من اسمه هو كل ما يتعلق بالنفس، اللي بتديه و اللي بتستقبله واللي بيدور جواها من غير ما تاخد بالها، او حتى و هي واخدة بالها
الموقع ده بيتكلم عن أمور كتيرة بتحصل في حياتنا اليومية كلها نابعة من النفس، و ليها تفسيرات في العلوم المختلفة، ووظيفة الموقع ده انه يتكلم عن كل اللي بيحصل في حياتنا من منظور علم النفس
ليه تقرأ في علم النفس ؟
يمكن تعرف حاجة عنك مكنتش واخد بالك منها، او تكتشتف انك مطلعتش مريض زي ما انت فاكر و ده تصرف طبيعي .. او يمكن طلعت مريض ! بيخليك تعرف تتقبل تصرفات للاخرين لما تفهم دواخلهم اكتر، تفهمهم اكتر، و بالتعبية تتأذي أقل.
العلم في العموم، سواء علمك عن نفسك او عن الكائنات اللي حواليك بيوصلك لدرجة من التصالح مع العالم، انت في أمّس الحاجة ليها !
علم النفس موجود في كل حركة بتعملها .. من اول ما تصحى من النوم و الحركات الغير واعية اللي بتعملها، وكمّل معاها تعاملك مع الناس طول اليوم، تفكيرك في دماغك طول اليوم، احلامك و انت نايم .. كل حاجة ليها تفسير في علم نفس .. وده اللي بنحاول نوصله في البلوج ده بطريقة مبسطة.