9 أنواع للذكاء
“هو ذكى بس مبيذاكرش”
الجملة اللى تقريباً مفيش بيت مسمعهاش قبل كده .. لما والدك أو والدتك يكونوا شايفينك مبتذاكرش ويكونوا عايزين يحسنوا شكلك قدام الناس ويقولولهم الجملة دى على أساس إنك سايب زمايلك اللى فى المدرسة تاكل عيش عشان أنت لو ذاكرت هتحط عليهم كلهم … لكن أنت من جواك بتكون عارف إن ذكاءك الدراسى عبارة عن برطمان صلصة فاضى.
والحقيقة سواء أنت أو أهلك فانتوا مفيش حد منكم صح بالكامل أو غلط بالكامل … يعنى أنت مش غبى زى ما أنت فاكر … لكن مش بالضرورة تكون ذكى بالطريقة اللى هما فاكرينها … نظر الناس للذكاء هى الشخص اللى بيبجيب درجات عالية فى المدرسة أو بيخترع حاجة مثلا .. إلخ.
سنة 1983 عالم اسمه هاورد جاردنر كان عنده استغراب تجاه نظرة الناس للذكاء … وده خلاه يبتكر نظرية جديدة للذكاء وهى نظرية الذكاءات المتعددة.
النظرية دى بتقول إن الذكاء مش نوع واحد بالعكس هو 9 أنواع وكل نوع ليه خاصية ذكاء مختلفة.
ذكاء علم الطبيعية (naturalist)
تخيل نفسك أنت بطل فيلم Cast Away بدل توه هانكس ووقعت فى جزيرة ومفيش معاك حاجات كتير تساعدك .. يا ترى إيه اللى هيحصلك؟
طيب لو كنت واحد من المشاركين فى ألعاب الجوع “Hunger Games” تفتكر هتفضل عايش كتير ولا هتموت مع أول دقيقة 😀
نوع ذكاء علم الطبيعة بيكون واضح فى الناس المزارعين والصيادين وهما بيلاحظوا تفاصيل الحاجات اللى حواليهم .. ممكن تلاقيه بيوريك نبات معين أو حشرة معينة … وبعد دقيقة تشوف نفس الحاجة لكن هو يقولك لا ده نوع مختلف عشان فى خط رفيع أو تفصيلة معينة مختلفة.
الذكاء الموسيقي (musical-rhythmic)
“الولد ده عنده أذن موسيقية” … الجملة دى فى الغالب بتتقال على أصحاب النوع ده من الذكاء، بيكون شخص عنده أذن وحاسة سمع حساسة للغاية … لما بيسمع معاك أغنية هو بيكون واخد باله جدا من الأغنية والنغمة والموسيقى واللحن وكل حاجة تقريبا.
الذكاء الرياضي المنطقي (logical-mathematical)
فاكر أول واحد كان بيحل مسالة الرياضيات فى الفصل … ده مثال حى للذكاء الرياضى المنطقى. النوع ده من الذكاء بيتمتع بقدرة تحليلية عالية جدا … وبيتعامل بالمنطق وده بيخلى عنده قدرة حل المشاكل لانه بيفكر فيها بشكل منطقى ويحللها وبيقدر يلاقي حل مناسب.
والنوع ده ذكائه مش فى الأرقام بس .. لا ده التكنولوجيا وعلوم الحاسب والكيمياء وعلوم الرياضيات بشكل عام.
ذكاء الوجودية (existentialist)
“أنا ليه .. أنا إزاى … أنا إمتى” … الجملة دى قالها الضيف أحمد فى فيلم واللى بيعبر بيها عن أصحاب الذكاء الوجودى.
النوع ده من الذكاء بيكون عنده قدرة عالية جدا على التفكير بطريقة تجريدية تجاه الأفكار الفلسفية والوجودية .. زى الموت والحياة والأسئلة العميقة فى الحياة … زى إحنا إيه سبب وجودنا فى الحياة وغيرها من المعضلات الفلسفية والأخلاقية.
ذكاء معرفة الآخرين (interpersonal)
صاحبك أو صاحبتك اللى بتكون عارفة الحالة النفسية النهارده لكل اللى موجودين فى الشغل … وبيكون فاهم جدا طباع ونفسية كل شخص فى العموم عاملة إزاى … هما دول أصحاب ذكاء معرفة الآخرين.
النوع ده مميز جدا جدا فى التعامل مع الناس وملاحظة أى اختلاف يطرأ على حالتهم النفسية … وبيقدروا يشوفوا الحاجة من أكتر من منظور واحد … الشخصية دى بتظهر بوضوع فى الأشخاص المتميزين من رجال الدين أو السياسة.
الذكاء البدني والعضلي (bodily-kinesthetic)
“كابتن يحي ده أقوى واحد فينااااااااااااااااه”
النوع البسيط السهل اللى بيكون واضح فى الشخص من وهو صغير فى فرط الحركة … أه طبعا مش كل الأطفال اللى عندهم فرط حركة أصحاب ذكاء بدنى وعضلى لكنها علامة لا بأس بها. النوع ده بيكون عنده مرونة فى جسمه وحركة جسمه بشكل عام.
بيكون مميز النوع ده وبيظهر فى الرياضة والتمثيل وكمان البهلوانات.
الذكاء اللغوي (linguistic)
النوع ده من الذكاء بيمثله كل الأشخاص غريبة الأطوار اللى كنت بتلاقيهم بيقولوا جهرة وبصوت عالى وبدون كسوف فى ابتدائى “أنا بحب النحو” ???
هنا إحنا بنتكلم عن نوع ذكاء عنده حس لغوى عالى … وهتلاقيه بيستخدم كلمات فى كلامه ممكن تسمعها لأول مرة فى حياتك … النوع ده هتلاقيه فى الكتاب والمؤلفين والشعراء والصحفيين.
ذكاء معرفة الذات (intrapersonal)
فى نوع من الأشخاص بيكون عنده وعى ودراية كاملة بشخصيته … فاهم نفسه كويس جدا …. بيعرف امتى يشتغل كويس جدا جدا وامتى يريح … بيعرف يحفز نفسه لانه فاهمها وبيحقق أهدافه من غير ما يحط نظام مكافئة لنفسه ولا الكلام ده لانه بيلعب على سيكولوجيته كويس وعارف بيخطط إزاى وبيعمل إيه.
النوع ده بيكون مناسب جدا فى شخصيات الدكاترة النفسيين.
الذكاء الفراغي او البصري (spatial-visual)
النوع ده دماغه بتحب تترجم أى حاجة منتج بصرى … تلاقيه لما يذاكر يعمل خريطة حلوة جدا للمذاكرة عشان يلخص الدنيا ويسهلها على نفسه … وبيحب الرسم والألغاز وأنه يشوف الحاجة من منظور مختلف.
النوع ده صعب تتوه لانه بيكون جوه دماغه مرسوم خريطة البلد أصلا … وتلاقيه لما يلعب معاهم ألعاب المتاهات أسرع واحد بيطلع.
النوع ده من الذكاء منتشر بين المصممين والفنانين والرسامين والنحاتين والمصممين المعماريين والطيارين كمان.
دى كده كل أنواع الذكاءات اللى اتكلم عنها العالم هاورد جاردنر ….
