_ عارف الفريندزون ؟
= عارفها … ده أنا حافظها صم ?
الوقت اللى إحنا عايشين فيه دلوقتى الدنيا بقت منفتحة أكتر .. أنت بتتعامل كتير مع زمايلك فى الشغل … قرايبك .. جيرانك … أصدقائك فى النادى أو مركز الكورسات اللى بتروحه … وبنسبة كبيرة أى مكان من اللى قلتهم أنت هتكون بتقضى وقت أكبر بكتير مع الاشخاص دول من اللى بتقضيه فى البيت مع أهلك.
وفى ظل الفراغ العاطفى اللى ممكن يكون أشخاص كتير بيمروا بيه بيخلى أى تعامل لطيف بين شخصين يكون غير مفهوم سببه … وفى ظل الفترة الطويلة اللى بتقضيها مع الناس دى بيخلى فى مجال كبير لتكوين علاقة بين الأشخاص … لكن السؤال هنا .. يا ترى الشخص التانى بيبادلنى نفس المشاعر والإحساس؟
أوقات كتير بيحب مشاعر الحب اللى بتكنها لشخص عاملة زى الطريق … ناحية واحدة بس … مهما كان قدر الحب اللى بتحسه تجاه الشخص التانى ممكن يكون هو مش حابب العلاقة تتطور للمرحلة دى وتفضلوا فى مرحلة “الصداقة” لانها شايفاك بس “صديق” … لكن مازال فى احتمال برضو أنها تكون بتبادلك نفس المشاعر لكن مستنية منك الخطوة … وفى نفس الوقت أنت خايف تصارحها تخسرها كصديقة كمان … عشان كده هنتكلم عن علامات لما تشوفها تعرف أنك بالنسبالها مجرد صديق وأنك اتحطيت فى “الفريندزون”.
- أنت دايماً اللى بتبادر
بنسبة كبيرة خرجتوا مع بعض أكتر من مرة … بس يا ترى فى كل المرات دى افتكر … كام مرة هى اللى اقترجت الموضوع انكم تخرجوا … قالتلك قبل كده تعالى ننزل نشرب حاجة فى اى كافيه او تعالى نتغدى مع بعض.
أو حاولت تردلك المجاملات اللى بتقوهالها .. ولا أنت بس اللى على طول بتبادر؟
طبيعى أنك أنت اللى بتبدأ المبادرة فى اول كام مرة .. لكن فى أى مرة لقيتها هى بتبادر ؟
لو لا فده يدى احتمال أنها مش بتبادلك نفس الشعور. - عمركم ما خرجتوا لوحدكم
لو هى زميلتك فى الشغل أو واحدة من ضمن شلة الاصحاب يا ترى عمركم خرجتوا لوحدكم … ولا دايما بتكون الخروجة مع الجروب أو مع الشركة ؟
ممكن موضوع إن معظم الخروجات بتكونوا قاعدين جمب بعض أو أكتر حد بتكلمك يكون مجرد صدفة مش أكتر… لكن فى الحقيقة مكنش فى أى فرصة أنكم تقضوا كام ساعة مع بعض لوحدكم فى أى كافيه.
ممكن هى بتكون بتحب الكلام معاك مفيش مشكلة … لكن مش لدرجة أنكم تتصاحبوا وتخرجوا مع بعض لوحدكم أو لمرحلة الارتباط … وده معناه إنها شايفاك “صديق”. - هتحكيلك عن اللى بتحبه
أحيانا البنت بتحكى عن الولد اللى بتحبه لحد معجبة بيه عشان تشوف رد فعله … لو كان بيغير تقدر تتاكد أنه عنده مشاعر تجاهها.
لكن ده مش بيكون فى كل الحالات … لان الغالب ده بيحصل لما البنت بتشوفك أنك “صديق” ليها أكتر من أى حاجة تانية.
طبعا الموضوع مش سئ للغاية لان البنت مش هتحكيلك حاجة زى دى تعتبر سر الا اذا كانت واثقة فيك ومعتبراك صديق مقرب ليها وأنك بتستمع ليها باهتمام وتقدر تأتمنك على سرها … لكن للاسف يا معلم لما بنت بتحكيلك أنها بتحب حد ده معناه إنها مش بتحبك. - أصدقاء لمدة طويلة
تعرفوا بعض بقالكم قد ايه ؟ لسه متعرف عليها من كام شهر … ولا بقالكم سنين تعرفوا بعض ؟
للاسف لو بقالكم سنين تعرفوا بعض وأنت معجب بيها فى الفترة دى كلها وكل حاجة بينكم كانت فى مرحلة الصداقة اللطيفة فده مش حاجة كويسة خالص … لان لو بقالكم الفترة دى كلها ومشاعر ومرحلة الصداقة متحولتش لاى نوع تانى من الارتباط فى الغالب ده عمره ما هيحصل.
فى الغالب ده بيحصل بسبب إنك بتكون مش عايز تخسر صداقة عزيزة عليك لو صارحتها ومكانتش بتبادلك الشعور … طبعا فى استثناءات للقاعدة دى بتحصل … بتلاقى اصحاب بقالهم سنين كتير وفجاة بيكتشوفوا أنهم بيحبوا بعض ومش قادرين يستغنوا عن بعض وبيتجوزوا .. لكن ده مبيحصلش بنسبة كبيرة - لغة الجسد
لغة الجسد فى النقطة دى والموضوع ده حاجة فى غاية الأهمية .. هتلاقي فعلا جسمها بيقولك كل حاجة
على سبيل المثال الـ Eye contact … أنت دايما هتكون بتبصلها وأنت بتكلمها فى عينها ومركز معاها جدا .. لو هى مش بتبادلك المشاعر هتلاقيها ممكن تبصلك وممكن متركزش أنها تبص .. ده مش معناه أنها مش عايزة تتعامل معاك أو بتكرهك لكن دى طبيعة البنى آدم العادى .. لكن لو بنفس الاهتمام هتلاقيها مركزة معاك زى ما أنت مركز معاها.
وقفتها قدامك يا ترى فيها انفتاح وبتقف عادى ولا فى انكماش فى وقفتها … بص على طريقة تعاملها مع باقى الأشخاص اللى حواليكم وشوف فى اختلاف معاك ولا بتعاملك زى باقى “الأصدقاء” - المجاملة بتحرجها
فى فرق كبير بين “الصديق” و”الكراش” … لو الموضوع مبيبقاش مريح أو لطيف لما بتعملها خدمة أو تعزمها على قهوة مثلا .. أو فى معاكسة لطيفة خفيفة زى إن لبسها النهارده ألوانه جميلة .. أو أنها أول مرة تشوفها لابسة الفستان ده .. لو المواقف دى كلها مبيكونش فيها ارتياح وتحسها محرجة وهى بتقبل الكلام ده منك فدى علامة مش لطيفة خالص … وبنسبة كبيرة ولا بأس بها أنت فى “الفريندزون”. - الفريندزون حلوة
اخر حاجة فى المقالة هنا دى مش علامة ولكن ملاحظة مهمة … وهى إن “الفريندزون” مش حاجة وحشة فى العموم … الصداقة هى نوع مهم من العلاقات كلنا محتاجينه … اه مش هو ده الحاجة اللى كنت منتظرها لكن “ليس كل ما يتمناه المرء يدركه”.
استمتع بعلاقة الصداقة دى لانها مفيدة ليكم انتم ال 2 … علاقات صداقة كتير بتبقوى أقوى وأطول من علاقات الارتباط اللى بتحصلك فى حياتك … ومتحاولش تغير طريقة تعاملك أو ترفض تواجدها طالما الدنيا كويسة بينكم أنتم ال 2 ومفيش أى ضرر أو أذى نفسي بيحصل لحد منكم.
