17 علامة تعرف/ى منها أنكم مش أصدقاء بس

أعرف 17 علامة تقولك بتحبو بعض ولا انتو أصحاب - علاقات-سايكو بوست

17 علامة تعرف منها انكم مش اصدقاء بس

العلاقات الإنسانية هى جزء كبير جدا من علم النفس، ونقدر نعتبره الجزء الأكبر تاثيراً والأكثر شيوعاً، وده مش عشان أسباب عميقة على قد ما بسبب إنه جزء أساسى فى حياة أى بنى آدم فعدد المتأثرين بيه كتير جدا، عكس أى حاجة تانية سواء العادات أو الحالات النفسية أو المتلازمات أو غيره.

هنتكلم هنا عن أكثر العلاقات النفسية وهى الإرتباط، فهيكون كلامنا عن العلامات اللى تقدر تعتبرها زى إشارات نفسية من الطرف التانى بتبينلك إنه مش بيعتبرك مجرد صديق أو صاحب، لا أنتوا داخلين على مرحلة الإرتباط.

قبل ما نبدأ هنكون حابين نوضح نقطتين:

أول نقطة هى إن الكلام هيكون بصيغة المذكر، بس الكلام هيكون المقصود بيه الجنسين، ممكن لو فى نقطة معينة بتكون باينة فى البنت أو الولد أكتر هنقول ده، لكن فى العادى الكلام هيكون بصيغة المذكر عشان نوحد صيغة الكلام مش أكتر.

تانى نقطة هى إن المصادر هتلاقيها فى آخر المقال … تقدر تدخل وتشوف ولو عندك اعتراض على حاجة تقدر توضحلنا وجهة نظرك فى كومنت.

يلا نبدأ ..

1) هتلاقيها واقفة جمبك

مش قصدنا أنها هتساندك لو وقعت فى مشكلة أو حصل موقف واحتاجت حد وهى ساعدتك، لا المقصود الـ Physical Appearance … هى حرفياً بتكون واقفة جمبك دايما لو فى خروجة، لو فى الشغل هتلاقيها دايما بتقعد جمبك وبتختار أقرب كرسى ليك.

فلو لقيتها دايما بتختار أقرب مكان ليك أو على طول بتدور عليك فى الخروجة عشان تكون قريبة منك، فدى علامة مهمة أنها مش بتعتبرك صديق بس، أنت بالنسبالها أكتر من صديق.

2) حافظة التواريخ المهمة

هتلاقيها حافظة التواريخ المهمة ومش بتفوتها، فى الأول الموضوع هيكون مقتصر على عيد ميلادك، عمرها ما هتنسى عيد ميلادك ولا هتنسى طبعا تجيبلك هدية، بعد كده الموضوع هتلاقيه بيتطور بتاريخ مناسبة معينة مهمة بالنسبالك، أول يوم شغل ليك … هتلاقى فى تواريخ مهمة فى حياتك هى دايما فاكراها وعمرها ما بتنسى.

3) الـ Physical Contact

فى دارسة عملها عالم النفس الدكتور جيرمى نيكلسون (موجود فى المصادر) بيقول إن لما شخص يحب إنسان معين بيحاول يستغل كل الفرص عشان يلمسه، فأنت هتلاقيها على طول بتسلم عليك، لو عايزة تناديك هتخبط على كتفك، والعكس برضو فى الحتة دى جدا.

4) بتضحك على نكتك

لما بتكون قاعد فى Meeting أو خروجة مع اصحابكم وهى موجودة هتلاقيها بتضحك على أى نكتة أنت بتقولها حتى لو مش Funny أوى، وده مش نفاق أو أنها بتجاملك عشان متخليش شكلك محرج لما محدش يضحك على النكتة بتاعتك، بالعكس هى بتستقبل منك كل حاجة بطريقة غير اللى باقى الأشخاص اللى حواليها بيستقبلوها.

5) بيحاول يقعد معاكى لوحده

النقطة دى فى الغالب بتكون ملحوظة فى الولاد أكتر حبتين، هتلاقيه بيحاول يقعد معاكى لوحده، يعنى لو خارجين فى جروب هيقوم سايب الجروب وواقفين جمبهم عادى بس بعيد عنهم خطوتين، المهم تكونوا لوحدكم وبتتكلموا براحتكم، دى واحدة من العلامات المهمة جدا واللى أثرها النفسى ودلالتها النفسية قوية جدا.

6) تبدأ تهتم بمظهرها أكتر

البنت العادى بتاعها أنها بتهتم جدا بمظهرها، لكن هتلاقى الموضوع زاد حبتين تلاتة فى الأيام أو الأوقات اللى أنت هتكون موجود فيها، هتلاقى كل مرة فى تفصيلة جديدة عشان تشدك تاخد بالك منها، تسريحة شعر جديدة، فستان جديد، الـ Perfume اللى بتستخدمه، أى حاجة عشان تلفت نظرك تكلمها (اللى هو خلى عند أهلك دم وركز 😀 ).

7) الـ Body Language

لغة الجسد من الحاجات اللى ليها تاثير نفسى كبير، أنت فى العادى 30% بس من كلامك هما اللى بتقولهم … لكن الـ 70% الباقية هى مظهرك ولغة جسدك، المهم هتلاقى فى حاجات وحركات معينة بتدى مؤشر معين، يعنى البنت هتلاقيها بتعدل شعرها معاك، أو بتلعب فى خصل شعرها وهى بتكلمك، دى شئ لا واعى هى مبتكونش قاصدة كده ده فى الغالب بيحصل بشكل لا إرادى.

أما الولد هتلاقيه بيحاول يقلل المسافة اللى بينكم جدان يعنى لو فى شنطة ما بينكم يشيلها ويحطها على الأرض بحيث يقرب منك، ويمكن الموضوع ده من أكتر المواضيع اللى لو ركزت فيها هتلاحظ مدى تاثيرها، الإنسان عامة بيحاول دايما يقرب من الأرض عشان راحة جسمه، يعنى لو أنت واقف بتقرب من الأرض وتقعد عشان ترتاح أكتر، لو قاعد بتنام ودى أكثر سبل الراحة وأقربهم للأرض، فموضوع القرب دى عامل نفسى قوى جدا.

8) الـ Eye Contact مش طبيعى

يمكن مفيش حاجة ثابتة للموضوع ده عشان كده كتبت مش طبيعى، فى ناس بيكون الـ Eye Contact قوى جدا وتلاقيها بتبصلك لفترة طويلة بعد ما تخلصوا كلام، لكن فى نوع تانى بيكون خجول جدا، ومبيقدرش أصلا يعمل Eye Contact … فالنقطة دى من الحاجات الـ Confusing جدا، لكن الأكيد إن الموضوع هيبقى واضح أنه مش طبيعى.

9) هتخرجوا مع بعض

دى تفصيلة صغيرة بس مهمة جدا، هتلاقيها يوم بتسالك هو فى أفلام إيه فى السينما الفترة دى فهتقولها فى أفلام كذا، هتقولك طيب ما تيجى نروح فيلم كذا، أو ما تعزمنى على فيلم كذا 😀 بترميلك Hint كده وأنت بتقولها تمام وبتخرجوا، أو بتقولها شفتى مسار إجبارى عاملين حفلة فى الساقية وأنا رايح … تيجى؟، وهى مش هتكدب خبر وتقولك تمام وتروحوا الحفلة.

10) هتعمل شغلك

مش هتعمل شغلك بمعنى إنها لازم تكون معاك فى الشغل، لا عادى هتلاقيها بتعمل أى حاجة تخصك وأنت متاخر فيها أو مكسل تعملها، يعنى لو Task متاخرة هتعملهالك، لو فى مشوار قريب من بيتها هتقولك ده قريب مننا هعملك أنا المشوار ده، أى حاجة هتقدر تعملها بدالك أو تساعدك فيها هتكون أول الموجودين.

11) هتهتم بتفاصيلك

يعنى هتجيبلك التيشرت اللى كنت مكسل تنزل تشتريه، هتحجزلك معاد مع دكتور سنان كويس بعد ما تقولها إن سنانك بدأت توجعك، هتشتريلك الكتاب اللى قولتلها الكتاب ده حلو جدا هجيبه الشهر الجاى لما اقبض، هتلاقيها بتهتم بتفاصيل غريبة متعرفش هى ركزت فيها ازاى.

12) هتقلدك

لو أنت بتحب الكورة هتلاقيها بتكلمك عن ماتش الأهلى والزمالك الأخير وإزاى عماد متعب كان المفروض ينزل من أول الماتش وأيمن حفنى مكانش فى الفورمة، لو بتحب المزيكا هتلاقيها كل يوم الصبح بتبعتلك مزيكا لعازف مشهور وتقولك أنا بحب المزيكا دى جدا، هتلاقيها بتقدلك دايما فى اهتماماتك، لو بتحب حاجة هتحبها هى كمان عشان يبقى فى حاجات مشتركة ما بينكم.

13) هتـStalkـك 😀

النقطة دى لا يستطيع التعبير عنها حد أكتر من “روز” أحد أبطال فيلم “شركة المرعبين المحدودة” لما قالت جملتها الشهيرة “أنا حاطاك فى دماغى … وبراقبك … وهراقبك” 😀 😀

مش لازم تبينلك ده بالعكس، هتلاقيها فى الحفلة اللى أنت رايحها وجاية تسلم عليك وتقولك “إيه ده أنت كمان هنا؟” ، أو هتلاقيه بيروح يشترى من نفس البراند اللى بتشترى منه هدوم ويقولك إيه ده أنتى كمان بتحبى تشترى من هناك … حجج فارغة يا بنتى 😀 😀

14) هيعاكسك

كل ولد مهما كان جاف فى كلامه أو شكله هادى فهو بيحب يعبر عن إعجابه، فأنتى هتلاقيه فى يوم ما شافك لابسة فستان جديد أو شكله جميل عليكى فهيقولك إنك جميلة النهارده (اللى هو الحمد لله إن البعيد أخد باله)، فلو عاكسك فده مش معناه أنه عينه زايغة أو الكلام ده، بالعكس ده علامة قوية كده أنه Attracted ليكى.

(طبعا الكلام ده ما بعد الصداقة، اللى هو إحنا بنتكلم على 2 يعرفوا بعض بقالهم فترة كبيرة مش واخد لسه شايفاه من يومين وجاى يعاكسك، لا التانى ده تديله على دماغه على طول 😀 )

15) مش هتصدك

على الجانب الآخر من الموضوع لو أنت ولد وعاكست البنت وهى مصدتكش أو ادتلك كلمتين حلوين كده عشان متبقاش تعاكس تانى فدى علامة قوية، فى المواقف والأحداث العادية مفيش 2 أصدقاء هيعاكسوا بعض، فهى طالما متقبلة الموضوع فده معناه أنها Interested أنها تخلى علاقتكم Deep أكتر من مجرد الصداقة.

16) سقف توقعاتها عالى

لو البنت (أو الولد بس الموضوع ده بيظهر شوية أكتر فى البنت) عندها مشاعر معينة تجاه شخص معين فهى هتكون مستنية منه كتير، مستنية منه كتير بمعنى أنه يكون جمبها دايما فى أى حاجة تمر بيها، بتعتمد عليك فى حاجات فى حياتها، بتاخد رأيك فى أهم الحاجات اللى بتحصل فى حياتها وبتكون مستنية أنك تشجعها على الصح، فهى سقف توقعاتها من ناحيتك بيكون عالى.

17) اتحرك يا مغفل

دى أقوى علامة وتقريبا البنت بتلجأ ليها لما الولد ميكونش واخد باله أو متلخبط ومش قادر ياخد قرار، بتلاقى كلامها فى تلميحات واضحة حبتين (اللى هو البعيد أعمى ولا إيه)، فعامة العلامة دى بتبين إنكم وصلتوا لأخر المنحنى بتاع الصداقة وعلى وشك أنكم يا ترتبطوا يا تعملوا لبعض بلوك.

ملخص الكلام ده كله هى إن العلامات دى وإن مكانتش كلام صريح إلا إنها مؤشرات قوية جدا، فأنت فى المرحلة دى تأكد That there’s no going back، أنت مهما عملت عمر علاقتكم ما هتبقى مجرد صداقة، فخد وقتك فى الموضوع وفكر فيه لأن العلاقات الغير واضحة دى بتسبب مشاكل نفسية ممكن نتكلم عليها فى مقال تانى، فخد قرارك من البداية بأنك تكمل حياتك مع الشخص أو اقطع الطريق من الأول بحيث متسببش لنفسك أو للطرف التانى أى أذى نفسى.

  : المصادر

مصدر 1
مصدر 2
مصدر 3
مصدر 4
مصدر 5

   :  مقالات مشابهه

احنا ازاى بنحب ؟ 

تمشى ورا قلبك ولا تمشى ورا عقلك ؟ 

 

كاتب المقالة

سبارتاكوس

لا تخسر فى حربك كما خسر سبارتاكوس ولكن اصمد مثله !

3 thoughts on “17 علامة تعرف/ى منها أنكم مش أصدقاء بس

  1. عايزة اعرف ايه العلامات اللي بتكون واضحة علي الراجل المتزوج لو فكر يستغل واحدة بنت و خصوصا لو كان هو المدير بتاعها لان كل الكلام اللي فوق طبيعي جدا يحصل بين استاذ و باحثة

    1. الأستاذ هيخرج معاكى ؟ هيعمل شغلك فى البحث ؟ هيعاكسك ؟
      لا طبعا اللى فوق ده مش طبيعى يكون بين الأستاذ والباحثة … ولو الأستاذ بيعاكس باحثة وبيحاول يراقبها أو يحتك بيها سواء بقى كان متجوز أو لا ده يبقى اسمه “ابتزاز” واستغلال لسلطته
      وساعتها الباحثة محتاجة تكلمه فى النقطة دى أو تشتكيه لو لزم الأمر لأن ده مش الطبيعى خالص

  2. ولو عمل كل دا واكتر وقال انه مفيش حاجة من نحيته في الاخر المفروض البنت تتصرف ازاي؟

Leave a Reply

Your email address will not be published. Required fields are marked *