17 علامة تدل أنك ناضج عاطفيا
- بتفهم السبب الحقيقى للأفعال
بتبدأ تدرك إن الأفعال السيئة أو السلوك السئ لجزء كبير من البنى آدمين بيكون سببه الخوف والقلق من حدوث أشياء معينة مش زى ما بيتم تصوير الفعل إنه عمل كده عشان شخص حقير أو غبى.
فى المرحلة دى بتبدأ تتخلى عن فكرة إن كل أفكارك هى الصح بس وإن البشر كلهم وحوش مؤذية … مع الوقت بيبقى إدارك ده مريح نفسيا ليك وللأشخاص اللى حواليك. - الناس مش بتعرف تقرأ الأفكار
بتتعلم إن الناس مش بتعرف تقرأ الأفكار اللى موجودة جوه دماغك لمجرد إنك فاكر كده. بتدرك إنه مع الآسف محتاجين نتعبك شوية وهتضطر آسفاً إنك تتكلم وتعبر عن أفكار ومشاعرك عن طريق اختراع اسمه “الكلام” ??
وبتبدأ تستوعب إنك متقدرش تلوم الناس أنها مش قادرة تفهم أفكارك طالما أنك معبرتش ومشرحتش أفكارك دى بطريقة واضحة. - أحيانا “بتغلط”
طبعا الكلام ده مش للبنات … لان البنات مبتغلطش ?? … فى الحقيقة دى واحد من الخطوات والعلامات المهمة اللى بتدل على النضح العاطفى … إنك بتبدأ تستوعب إنك بتغلط وتاخد كمان خطوات نحو إنك تعتذر لما تعمل الغلط. - الثقة بالنفس
فى الوقت ده ثقتك بنفسك بصورة كبيرة جدا … وبتزداد مش عشان أنت بتشوف نفسك شخص قوى جدا فى الحاجة اللى بتعملها سواء فى شغلك أو فى الحياة … لكن بتزداد عشان بتبدأ تفهم وتستوعب أكتر إن كل الأشخاص عندهم قدر لا بأس به من الغباء والخوف والتوهان زيك بالظبط ومش أنت لوحدك اللى تايه فى حياتك … كلنا عندنا نسبة من كل الصفات السيئة وده طبيعى. - التسامح مع الأهل
بتبدأ تسامح مع أهلك (ده فى حالة كنت من الأشخاص اللى كان عندهم مشاكل مع أهلهم سواء كان بسبب طريقة التربية أو الوضع الإجتماعى أو حتى أنهم سبب مجيئك للدنيا) لأنك بتدرك إن سبب الخلفة وإنك تيجى الدنيا مكنش عشان يضايقوك … لكن الموضوع كان أعمق من كده بكتير وكانوا بيعانوا من مشاكل الحياة وممكن مشاكل نفسية جواهم عشان يحاولوا يكونوا قدامكم بأفضل صورة ممكنة … حتى لو مكانتش الصورة هى الشخص المناسب ليكم.
ومع الوقت الغضب اللى كان موجود منك تجاههم بيتحول لشفقة وحب. - الشعور بالامتنان
هيبدأ ينمو عندك شعور بالامتنان تجاه الكثير من الأشياء اللى نقول عنها “صغيرة” … زى أنك تنام نوم مريح … الأكلة اللى بتحبها … المشروب المفضل .. تقضى يوم اجازة بهدوء من غير عصبية … إلخ.
ونتيجة لده بتتعلم إنك مهما حصل متحاولش تناقش مشكلة مع شريك حياتك الا لما تكونوا أنتوا الـ 2 مرتاحين ومش متعصبين … شبعانين … ومحدش منكم مستعجل ووراه شغل لازم يخلص. - بتبطل تتقمص
لو أنت من الناس اللى بتقعد زعلانة بالايام من أصحابهم أو اخواتهم … هتبدأ توقف الموضوع ده لانك بتبدأ تستوعب إن زى ما بيقولوا كده كلنا هنموت ووقتنا هنا قليل … فتفهم إن مش كل الناس هتفهمك وبتقولهم بوضوح إن الحاجة الفلانية دى بتضايقك … فلو فهموا وبطلوا .. بتسامحهم.
أما بقى لو مفهموش قصدك وعملوها تانى .. بطريقة ما بتسامحهم برضو ?
ملحوظة مهمة: طبعا الموضوع فى سياق الاخطاء البشرية العادية مش الأذى النفسى. - الكمال لله وحده
بتبدأ توقف فكرة إن كل حاجة لازم تبقى Perfect … أو زى ما الكتاب بيقول .. لازم الشغل اللى اشتغله يكون فى أحسن شركة .. لازم الشخص اللى ارتبط بيه يكون بجناحين وبيطير بعد الظهر … لازم الحياة كلها تبقى سعيدة عشان ننزلها على إنستجرام .. وهكذا فى كل حاجة.
لكن بتتخلى عن النظرة دى وبتتبنى نظرية “إحنا عندنا concept اسمه الحمد لله” .. أو زى ما بيقولوا كده إن حاجات كتير مش لازم تبقى perfect لكن ممكن تبقى Good enough … إن الحاجة تكون كويسة على القدر اللى أنت محتاجه .. وهتلاقى حاجات كتير فى حياتك Good enough وأنت سعيد بيها عادى جدا. - فوائد التشاؤم
هتبدأ تشوف الجانب المشرق من التشاؤم … وإن توقعاتك تجاه الأحداث اللى هتحصل بتبقى أقل تفاؤلاً. ونتيجة لده بتبقى شخص أكثرهدوءاً وتسامحاً … وبتتخلى عن فكرة المثالية وبتكتسب سلام نفسى وصبر أكبر. - ترى الأشخاص أكثر وضوحاً
هتبدأ تشوف إن عيوب الناس هى جزء من شخصيتهم واللى بيكون فى مقابلها مميزات تانية. بدل ما كنت بتبص على نص الكوباية الفاضى وشايف عيوبهم بس .. بتبدأ تبص على الصورة الكبيرة والشخص نفسه ككل وبتشوفه بوضوع أكتر … يعنى ممكن تشوف مديرك شخصيته قوية وعصبى فى بعض الأحيان ومبيحبش فكرة أنك تأخر الشغل .. لكن كمان هتلاقيه بيدافع عنك كويس جدا قدام أى إدارة تانية لانك جزء من فريقه. أختك اللى مبهدلة الأوضة وكل حاجة ليها فى مكان مختلف لكن هتلاقيها بتفكر دايما بطريقة مختلفة ومبدعة.
فى الوقت ده بتدرك بشكل حقيقى إن الأشخاص “المثاليين” هم فى الحقيقة غير موجودين. - تسامح نفسك
بتتعلم تسامح نفسك على الأخطاء الغبية الكتير اللى عملتها فى حياتك. بتدرك إن تأخرك فى أنك تتعلم الدروس اللى بتشوفها فى الحياة جاى من أنك دائما بتلوم نفسك على أخطائك. بتبدأ تتسامح مع نفسم وتصاحب نفسك أكتر.
طبعاً أنت لسه شخص غبى … لكن جميل وتتحب .. كلنا كده. - الطفولة المتاخرة
بتتعلم إن جزء كبير من النضوج بيكون فى التعامل مع الشخصية الطفولية والعنيدة اللى جواك واللى هتفضل موجودة على طول. بتتخلى عن فكرة إنك لازم تتصرف كشخص كبير وعاقل فى كل الأوقات. ولما يجى المناسبة والوقت اللى تلاقى فيه الطفل اللى عنده سنتين مستعد إنه ياخد فرصته … اديله الفرصة والاهتمام اللى عايزهم وافرح ♥ - الكنز فى الرحلة
بتبدأ توقف سعادتك على نجاحك فى الخطط الكبيرة والرئيسية فى حياتك واللى ممكن تاخد سنين لحد ما تتنفذ. بدل كده بتبدأ تحتفل وتفرح بالنجاحات والانجازات البسيطة اللى بتحققها فى حياتك. تنبسط لما يعدى يوم كامل من غير ما يحصل حاجة تضايقك … بتنبسط فى النهار عشان بتشوف الزهور … وبتبسط فى الليل عشان بتشوف النجوم … وبتبدأ تشعر بالسعادة تجاه الأشياء البسيطة. - تجاهل آراء الآخرين
اهتمامك بفكرة الناس عنك ورأيهم فيك بيبدأ يقل. بتدرك إن عقول الناس فى العموم هى مناطق مشوشة وصعب إنك تفضل عايش حياتك كلها بتحاول توصل للناس صورتك أو شخصيتك الحقيقية. المهم فى الموضوع ده كله إن تفضل أنت والمقربين منك واللى عادى جدا يكونوا شخص أو 2 بس تفضلوا متعايشين ومتفهمين الشخصية الحقيقية ليك وتبدأ تعتمد أكتر على محبيك وليس على الناس. - تقبل النقد
بتظهر تحسن كبير فى الإستماع لنقد الآخرين ليك. بدل ما أنت كنت بتفترض إن أى حد بينقدك يا إما هو غلطان والحاجة دى مش فيك … أو بتفتكر إن قصده أنه يضايقك بعيوبك بتفكر إن ممكن الحاجات اللى الشخص بيقولها دى ممكن ناخد منها نقد حقيقي فعلا وتحاول تعالجه … بغض النظر عن نية الشخص ده من النقد.
بتبدأ تفكر فى النقد ده وتسمع اللى بيتقالك وتحاول تعالجه بدل من أنك تفضل تدافع بس عن نفسك أو أنك تنكر وجود الشئ ده فيك من الأساس. - تأثير التربية على أفعالك
بتبدأ تدرك إن فترة طفولتك بتؤثر على طريقة تفاعلك مع الأحدث اللى بتحصل فى حياتك … وبتحاول تتعلم إزاى تعوض التشويه اللى حصلك ده. بتبدأ تتقبل إن بسبب طفولتك ممكن تبالغ فى ردود أفعالك فى بعض المواقف. وبتبقى أفكارك الأولى مريبة تجاه مواضيع معينة … وساعتها بتتعلم إن مش لازم ننساق وراء انطباعاتنا الأولى تجاه شئ ما. - المعنى الحقيقي للصداقة
لما بتكون صداقة بتبدأ تفهم معنى الصداقة الحقيقى … وهو إن الأصدقاء مبيكونوش مهتمين يعرفوا أخبارك السعيدة على قد ما هما مهتمين بأخبارك وإيه الحاجات اللى بتخليك تشعر بالقلق والخوف عشان يخففوا عنك ويبدأ شعور الوحدة والخوف فى قلبك يبقوا أقل. مع الوقت بتبقى صديق أفضل لانك بتدرك إن الصداقة الحقيقة فى مشاركة الأشياء المهمة.
دى أكتر العلامات اللى هتقدر تحسها مع الوقت … وكل ما حسيت بأشياء أكتر كل ما تسامحك تجاه نفسك والآخرين ونضجك العاطفى بقى أكبر … وده هينعكس بصورة كبيرة جدا على صحتك النفسية وسلامك الداخلى.
