10 علامات للشخص السيكوباتى
الشخص السيكوباتى هو شخص شرير كل غرضه هو أنه ياذى الناس، بيكون دايما معاه سلاح وبيجرى بيه ورا ضحاياه زى باتريك بايتمان فى فيلم “American Psycho”، أو شحص بتقابله وبتضطر تقعد معاه وتبات معاه وتكتشف أنه عايش أكتر من شخصية واحدة مع بعض زى نورمال بيتس فى فيلم “Psycho” …. أو أنه شخص ذكى وبيتكلم بلباقة زى دكتور هانيبال … أو الجوكر اللى يعتبر الشخصية المفضلة لكتير جدا مننا رغم أنه سيكوباتى عادى جدا 😀 😀
الكلام ده تروح تقوله لمخرج سينما ميديوكر عايز يعمل فيلم يعمل بيه شوية إيرادات حلوة ويدخل بوكس أوفيس مش كلام فى مقالة لسرد عن الشخصية السيكوباتية أو زى ما علم النفس بيقول اللى عندها “اعتلال نفسى” … الكلام اللى فوق ممكن جدا يكون فى الشخص السيكوباتى مبنقولش لا .. لكن ده الشكل اللى بيحبه صناع السينما … لكن مش هو التعريف العلمى للشخصية دى.
الشخص السيكوباتى هو شخص عنده اضطراب شخصية معروف باسم “الاعتلال النفسى” وهو بيندرج تحت قسم “اضطراب الأشخاص المعاديين للمجتمع” …. النوع ده من الشخصية بتتميز بأنها معندهاش تعاطف مع الآخرين .. ومبتندمش على أفعالها …. وسلوك معادى للمجتمع … هوليوود بتحب جزء الجنون فى الشخصية السيكوباتية لانه زى ما بيقولوا بيعمل جو فى الفيلم ومن أسباب ارتفاع ايرادات الفيلم والجمهور بيحبه.
لكن الحقيقة إن واحد من كل 100 بنى آدم هو شخص سيكوباتى .. عارف زى مين ؟ أنت أو أصحابك مثلا !!!
لما بنتكلم عن إحتمالية إن الشخص يكون سيكوباتى للاسف الاحتمالات ميتكونش فى صالحك … على حسب كلام دكتور بول بابياك بيقول إن 1 من كل 100 بنى آدم بيكون فى سلوكه تصرفات سيكوباتية … و1 من كل 25 مدير كذلك بيكون سلوكيات سيكوباتية.
الغالب فى موضوع الشخصية السيكوباتية بيرجع للجينات بشكل كبير … اه معظم المجرمين سيكوباتيين لكن الغالبية العظمى من الشخصيات السيكوباتية ملهومش أى علاجة بالجرائم.
خلينا نتكلم عن 10 علامات للشخص السيكوباتى:
- انعدام العاطفة
الشخص السيكوباتى مبيكونش عنده أى مشاعر عطف … هو عارف المشاعر اللى أنت بتحسها لكن هو بيحسهاش … لما حد بيحكيله عن شهوره بالحزن بسبب وفاة شخص عزيز عليك أو بسبب إن الشخص اللى بتحبه سابك مثلا هو مبيكونش حاسس بالتعاطف تجاهك لكن بيحاول يتظاهر بالتعاطف عشان يساعدك. - التلاعب
فى واحد من مشاهد فيلم “The Matrix” كان بيقوله أنه لو أخد الحباية الزرقاء هيرجع بيته وكل حاجة هتنتهى ولو أخد الحباية الحمراء هيفضل معاه ويكمل بقية أحداث الفيلم …. وفى الآخر بيكون الحبايتين ليهم نفس التاثير وهو بس بيتلاعب بيه وبيدفعه للاختيار اللى هو عايز نيو (الشخص اللى هياخد الحباية) يعمله بس عشان يخليه يفتكر إن ده حصل بمزاجه.
طبعا مبنقولش إن الحاج مورفيوس سيكوباتى ??? لكن هو ده أسلوب الشخص السيكوباتى فى التلاعب … بيحاول يقنعك ويوديك لاختيار معين هو عايزه بغض النظر أنت هتحس بايه أو ده هيفرق معاك ازاى فى حياتك الشخصية .. أهم حاجة يلعب اللعبة اللى بيحبها. - عدم المسئولية
الإستهتار والاهمال دده أسلوب حياة بالنسبة للشخص السيكوباتى … معندوش مانع يروح يشترى قميص جديد بـ 300 جنيه وهو فاضل 10 جنيه من المرتب فى جيبه .. هياخد فلوس من أى حد بقى من أهله ويحسسهم إنهم الذنب فى أنه مش قادر يعيش حياته زى أصحابه … أو تاخد فلوس من جوزها وتشترى حاجات ترفيهية فى وقت هما مش معاهم الفلوس اللى تكفيهم وتحسس زوجها إنه مش قادر ييصرف عليها. - النرجسية
الكون مبيدورش حوالين الشمس … لا بيدور حواليه هو بس … هو الأذكى والأفضل واللى المفروض كل حاجة تكون عشانه أو لسبب هو عايزه …. النرجسية هى جزء لا يتجزأ من شخصية الشخص السيكوباتى. - الكذب
الكدب ده مش مجرد عادة عند الشخص السيكوباتى …. ده يعتبر حجر أساس … كل حاجة فى حياته كدب … ويمكن دى من أكتر العلامات اللى بتظهر سلوك الشخص ده لأنه مبيهتمش باتقان الكدب .. بالعكس تلاقيه بيكدب كدب بسيط وكدبة كبيرة يقعد يبنى عليها كدب أكبر. - جذاب
هنا نيجى لواحد من السلوكيات اللى السينما بتركز عليها وهى أنه بيكون جذاب وأسلوبه ملفت للانتباه … الشخص السيكوباتى مبيكونش خايف يقول أى حاجة خالص وده بيعجب كتير من الناس خصوصا لو عندهم مشكلة فى ثقتهم بنفسهم .. لإن ده ممكن يبان أنه ثقة عالية ميعرفوش أنه نقص وواحد من سلوكيات السيكوباتية. - مبيندموش
زى ما قولنا فى الأول الشخص السيكوباتى لا يشعر بالندم على الإطلاق … مهما كانت أفعاله أو تصرفاته ليها أثر سلبى على الآخرين لكن هو معندوش أوبشن الإحساس بالندم ده. - الشعور الدائم بالملل
على طول حاسس بالملل .. وده بسبب أنه دايما بيحتاج أدرينالين فى جسمه عشان يحس بالمتعة والاثارة اللى بيدور عليها فى حياته. - متنمر
الشخص السيكوباتى دايما سلوكه بلطجى وعدوانى تجاه الأشخاص اللى مبيكونش ليه معاهم مصلحة أو هيستفيد منهم فى المستقبل، أيا كان سنهم سواء كان سنهم كبير أو أطفال …ده غير طبعا أسلوب الكلام السئ اللى وارد جدا يطلع منه فى أى وقت تجاههم.
والحاجة الأسوء من كده كمان هى البلطجة تجاه الحيوانات .. فى العموم هو بيصدر منه أسلوب بلطجة تجاه أى شخص أو حاجة عارف أنه يقدر يتغلب عليه أو مش هيستفيد منها. - مطالب دائم للسلطة
أيا كان نوع السلطة هو بيحاول يوصلها … يكون مدير فى الشغل … يتسلط على أخته … على مراته .. على أصحابه … أى نوع من أنواع السلطة .. وده مش عشان الأمور تكون كويسة على قد ما هو بيحب جدا قوة السلطة وأنه يتحكم فى حياة الآخرين … والأهم إن الأمور تمشى زى ما هو عايز.
طبعا مش كل الأشخاص اللى عندهم سلوك أو 2 من دول يبقوا سيكوباتيين … لا دى علامات بتحاول تعرفنا على سلوك الشخص ده … لكن لو أنت شايف إن فى حاجات كتير بتعملها ده معناه إنك محتاج تاخد خطوة تجاه الإرشاد النفسى أو العلاج النفسى لو تطلب الأمر.
أما لو شايف إن فيك علامة أو 2 فأنت محتاج تبص بمنظور أكبر على أفعالك وتصرفاتك وتشوف ممكن تحسن من نفسك إزاى وتحاول تعالج النقطة دى.
