10 علامات أنك قوى صحيا متزن نفسيا

10 علامات أنك قوى صحيا متزن نفسيا

لما بنيجى نتكلم عن الإتزان النفسى ناس كتير تصورها عنه هو الشخص اللى عنده سلام نفسى داخلى ورايق دايما وهادى جدا ومبسوط وسعيد فى حياته وكأنه عايش فى تومورو لاند مش معانا على كوكب الأرض … وده مش قصدنا هنا … فى الفيديو (المقالة) ده هنتكلم عن علامات بتدل إنك متزن نفسياً أكتر من غالبية الناس

  1. بتعرف تبكى عادى ( ارهاق عصبى _ ارتفاع ضغط الدم _ مشاكل فى الذاكرة)
    البكاء فى العموم مش علامة ضعف إطلاقاً … بالعكس الشخص اللى بيكتم مشاعره جوه نفسه ممكن ده يسببله مشاكل كتير جدا .. زى الإرهاق العصبى وارتفاع ضغط الدم وكمان مشاكل فى الذاكرة.
    على العكس فى حالة البكاء واللى بتطرد من جوه دماغك الأفكار والمواقف السيئة اللى حصلت لما بتحكيها … وكمان بيساعد على الإسترخاء والتخلص من العصبية. فالأفضل إنك لما تقابلك حالة نفسية وتكون حاسس إنك عايزة تبكى إنك تاخدى أقرب علبة مناديل وتروحى ركن هادى وتبكى براحتك.
  2. مبتحاولش تتحكم فى كل حاجة
    “مهو الواحد مش هيوصل لنتيجة كويسة طالما مشتغلش على الحاجة اللى عاوزها 25 ساعة فى اليوم وخلص ال 99 تاسك اللى قدامه”
    واحدة من أكتر الافكار المغلوطة إن الواححد لازم يكلف نفسه بمهمات كتيرة جدا عشان يوصل للنتيجة اللى هو عايزها، وده غلط خالص لان الرتم اللى بتشتغل بيه مهم جدا … مش لازم كل فترات شغلك تكون فى أفضل حالاتها … طبيعى جدا يكون فى فترات أقل انتاجية من غيرها بس حاول متخليهاش تطول واستغلها فى أنك تاخد بريك
  3. بتعرف تدير وقتك بحكمة
    متقضيش فترات حياتك فى الانتظار … فى حاجات كتير فى الحياة عموما بتاخد وقت .. زى أنك تدور على شغل جديد أو أنك تحاول تنزل وزنك … حاول فى النص أنك تشغل وقتك … زى أنك تحسن مهاراتك بجانب أنك بتدور على شغل … أو أنك تكون عادات أكل صحية بالتوازى مع تمارين الجيم اللى بتروحه عشان تنزل وزنك
  4. بتشعر بالامتنان تجاه الأشياء
    “إيه يا دنيا موراكيش غيرى ولا ايه” بصوت خالد الصاوى
    لو ده جزء أساسى من حياتك فمحتاج تغيره وتشعر بالامتنان تجاه أشياء كتير فى حياتك فى غيرك مفتقدها، زى أصدقائك أو أهلك أو شغلك او غيرهم.
    ممكن فى يوم تضايق إن الرحلة اللى كنت مستنيها بقالك فترة اتلغت … عادى جدا إنك تتضايق بس حاول متعيش جوه دور الضحية لانه أثره سئ جدا على صحتك النفسية.
  5. بتعامل الناس بخلق حسن
    معاملة الناس بطيبة وحسن نية ناس كتير بتقول عليه سذاجة أو ما شابه، لكن الطريقة دى فى التفكير الايجابى تجاه الأشخاص أو المواقف السيئة اللى ممكن تحصل فى حياتك دليل على إتزان نفسى وسلام داخلى يفتقده الكثيرون.
  6. بتتقبل الافكار الجديدة
    لو فى أفكار مبقتش مناسبة للعالم اللى إحنا عايشين فيه أو فى شغلك أو فى حياتك .. هل هتتقبل تغييرها ؟
    تغيير الأفكار وعدم التثبت والتمسك بأفكارك فى الحياة وتقبل الأفكار الجديدة من سمات الأشخاص المتزنين نفسيا … لكن الشخص المتزن نفسياً بيكون عنده المرونة أنه يترك الأفكار اللى مش بتخدم الوضع الحالى سواء فى حياتك أو فى شغلك.
  7. بتتعلم من أخطائك
    يا ترى لازم تعمل الحاجة الغلط 1250 مرة عشان تتاكد أنها غلط فعلا ؟ ولا ممكن زى البنى آدمين الطبيعيين تعمل الغلط مرة أو مرتين وبعدين لا خلاص واضح إن الحاجة دى فيها مشكلة ومحتاجين نغير تفكيرنا تجاهها ؟
    التعلم من الأخطاء شئ مهم جدا … لكن كمان الأهم من مجرد التعلم من الأخطاء هو أنك تتعايش وتتسامح مع نفسك إنك إنسان وطبيعى تعمل أخطاء فى الحياة.
  8. بتنفق أموالك بحكمة
    مين بيخلص مرتبه فى أول 10 ايام فى الشهر ؟
    طبعا نص اللى بيقرا المقالة (بيتفرج على الفيديو) عارف مين الشخص ده … الشراء والشوبينج من الحاجات اللى بتبسط البنى آدمين عامة .. لكن الكلام ده على المدى القريب .. لكن على المدى البعيد بيسبب شعور بالندم كبير لان 90% من الحاجات اللى بنشتريها مبيكونش عندنا احتياج حقيقي ليها … عشان كده قبل ما تنزل تشترى حاجة اكتب قائمة قبلها بكام يوم بالحاجات اللى هتشتريها ويوم ما تنزل بص عليها واسأل نفسه يا ترى كل اللى فى القائمة دى أنا محتاجه فعلا ؟ وساعتها هتلاقى نفسك بتلغى حاجات كتير. 
  9. لا تقع فى فخ التعلق العاطفى المرضى
    التعلق العاطفى المرضى أحد أسبابه هو قلة وانعدام الثقة بالنفس وإن الواحد مبيكونش مقدر قيمة نفسه الحقيقية … وده بيخلى الشخص اللى عنده تعلق مرضى أنه يعتمد على الآخرين فى أنه يصدروله أفكار تجاه نفسه أنه كويس ولطيف … رغم أنه فعلا ممكن يكون لطيف من غير ما يتعلق بيهم بالطريقة دى اللى بتاثر سلبيا عليه.
    عشان كده حاول دايما تجدد ثقتك فى نفسك … وادى للناس اللى حواليك سواء أصدقائك أو أهلك فرصة أنهم يدعموك ويساندوك ولكن بدون تعلق مرضى وهتحس بفرق كبير جدا فى إتزانك النفسى.
  10. مازلت تثابر
    الحياة عبارة عن ماراثون طويل مش مجرد سباق 100 متر … عشان كده الشخص اللى عنده إتزان نفسى بيكون عارف إن هيقابل فى طريقه صعوبات وفشل وتحديات كتير فى حياته … لكنه كمان عارف إن الإلتزام تجاه الأهداف المنطقية هيخليه قادر يواجه الصعوبات والتحديات دى ويوصل لأهدافه.
    التفاؤل شئ مهم لكن لازم يكون منطقى ويكون تجاه أهداف منطقية مش أحلام فى خيال الشخص … وحاول دايما تكسر هدفك الكبير لأهداف صغيرة عشان يديك حماس على طول الطريق إنك بتقرب من هدفك الرئيسى وقربت تحققه.

باختصار الإتزان النفسى له علامات كتير جدا … مش لازم يكون عندك الـ 10 حاجات عشان تكون متزن نفسياً … كل ما كنت بتتمتع بحاجات أكتر كل ما كنت متزن أكتر.

لكن الأهم هو أنك تفضل دايماً تحاول توصل لمرحلة أعلى من الإتزان النفسى والسلام الداخلى لإن ده هو اللى هيفرق فى حياتك الشخصية … مش شغلك ومش علاقاتك الإجتماعية اللى أنت شاكك باستمرارها ♥

كاتب المقالة

سبارتاكوس

لا تخسر فى حربك كما خسر سبارتاكوس ولكن اصمد مثله !

Leave a Reply

Your email address will not be published. Required fields are marked *