متلازمة طالب طب .. Medical Student Syndrome

من الأمراض الشائعة في طلبة كلية الطب مرض medical student syndrome ، مرض شائع في كلية ليه يعني؟

طبيعة المرض ده بتخلى اللي بيدرس طب لما بيقرأ اي اعراض لمرض بيبدأ يترجمها على نفسه و يبدأ يحسها و يجي في باله علطول انا عندي المرض ده !

بيسموه medical student syndrome  باعتبار ان هذا المسكين هو الشخص اللي بيتعامل مع اعراض المرض ..

لكن دلوقتي بما اننا بقينا بنقرأ عن اعراض الأمراض في كل مكان فهتلاقي ناس كتير تبدأ تـshare بوستات فيها اعراض امراض زي الاكتئاب او الشيزوفرينيا اوحتى الروماتيزم او او  او و تقول “ايه ده ! ده انا على فكرة”

هل انت فعلا بتكون عيان ؟

في احتمال كبير جدا ان دي تكون تهيؤات وانت  مش عيان اصلا !!

لكن المشكلة انك لما تكون فاكر نفسك مريض و تقعد تراقب تصرفاتك هتلاقي ان الاعراض بتقلب بجد وانت فعلا حاسس كده و بيحصلك كده ، رغم انك لو كشفت وروحت لطبيب هتلاقي الحقيقة بتقول انك مش عيان .. فهتفضل عيان ومش عيان و حياتك بقت مشاوير ورا دكاترة :/

مثال بسيط، مرض الإكتئاب ليه 9 أعراض مشهورين ..

زي ..

1- التركيز بيكون صعب و إتخاذ القرارات أصعب

2- التعب العام، و الطاقة القليلة جدا

3- إحساسا دائم بالذنب و ان الواحد ملوش لازمة او مفيش في إيده حيلة

4- إضرابات نوم، يا إما نوم كتير أوي يا إما نوم قليل أوي

5- علطول مش مستريح، و صبرك نافذ

6- مبقاش في استمتاع حتى بالحاجات اللي بتحب تعملها و هواياتك المفضلة

7- آلام في الجسم، سواء وجع في العضلات او صداع او مشاكل هضم

8- علول زعلان و غضبان وإحساس بالفراغ

9- التفكير في الإنتحار

الـ 9 أعراض دول بيقولوا ان المصريين كلهم عندهم إكتئاب O.o ؟

و ده شئ غريب جدا .. ينفع دولة كاملة يكون عندها إكتئاب ؟

أكيد لا .. أيا كان وضع البلد أو الظروف الحياتية مش كلنا لينا نفس التأثر بيها ..

أمال الأعراض اللي بتنتطبق على كل الأشخاص دي ايه ؟ ممكن تكون مش صح ؟

أو ممكن تكون المعلومات مش كاملة ..

يعني مثلا بقية تفاصيل الأعراض بتقول لازم يكون مر مدة زمنية معينة، وتبدأ تشوف في سبب ولا من غير، طب السبب ده عبارة عن ايه .. و تفاصيل كتيرة جدا تخلي ان مجرد معرفتك بالأعراض مش معناها انك مريض ..

الحل حاجة من اتنين

1- نبطل نتكلم عن الامراض واعراضها و نبعد عن ان الحاجات دي تنتشر على السوشيال ميديا و خلافه !

بس الحل ده مش منطقي ..

أولاً لإن الأمراض بتحتاج توعية و مينفعش منتكلمش عنها

ثانيا عشان انت مش ضامن ان كلنا نبطل ننشر ده و ده معتمد على الناس اكتر من عليك ..

طب و الحل التاني ..

2- انك تفهم نفسك كويس اوي و ساعتها هتفهم حاجات كتير من بعدها !

يعني ايه ..

يعني انك تبدأ تفهم كويس اوي احساسيسك المختلفة المتقلبة و تصرفاتك تجاهها اساسها ايه، تبدأ لما تشوف تصرفاتك تعرف مبررها، مفيش حاجة بتطلع منك من ولا شئ، يمكن تكون تصرفات بتطلع من عقلك اللا واعي، يعني مسببة برده بس عقلك الواعي مش واخد باله ..

أمثلة كتيرة بتحصل في حياتنا اليومية ..

يعني لما تلاقي نفسِك قاعدة تعيطي بقالك تلات ايام متواصلة، ليل و نهار و من غير سبب، متقوليش على نفسِك متكئبة لان ببساطة ممكن تكوني في مرحلة تغييرات هرمونية و ده سبب عياطك ..

او مثلا تصحي الصبح و يكون يومك كله كئآبة وحزن وفاكر انك زعلان من غير سبب ويستمر الموضوع اسبوع فالتاني، فتحس انك دخلت في اكتئاب.. رغم انك لو ركزت هتلاقي ان عندك stress في الشغل الفترة دي و ده اللي مسببلك الحالة دي ..

يعني الحل انك تمسك عرض عرض شوفته في المرض اللي انت بيتهيألك انه عندك و دور على سببه .. امشي وراه لحد ما هتلاقي ان ليه سبب تاني غير انك تكون مريض ..

ده مبيلغيش اوبشن انك تكون عيان، بس المريض مينفعش يشخص نفسه، بالذات الأمراض النفسية، لان جزء كبير جدا منها بيكون في الأعماق مش في الظواهر..

واكيد بعد ما عرفت ان في مرض اسمه medical student syndrome ده هيخليك متاخدش كل مرض تتطبقه عليك

كاتب المقالة

هيبنوس

كلامي لا يعجب أحد .. وكذلك فكري دائما منبوذ جدا .. انا اعلم أن بهم الكثير من الخلل ولكني لا أملك غيرهما فلن أخاطر بفقدهما ابدا . .

Leave a Reply

Your email address will not be published. Required fields are marked *