13 علامة للشخص ذو الميول الإنتحارية

13 علامة للشخص ذو الميول الإنتحارية

 

كام مرة صحيت والتايم لاين كله مقلوب على خير انتحار ولد أو بنت؟ المشكلة مبتكونش بس فى انتحاره لكن بتكون فى إن كل اللى حواليه بيقولوا إن الشخص ده مكانش باين عليه أى حاجة … بس الحقيقة مبتكونش كده … أى شخص قبل ما ينتحر بيدى علامات كتير لكن الناس مبتاخدش بالها .. مبتكركزش … بدل العلامة 20 علامة لكن محدش بياخد فعلا باله.

عشان كده بعد فترة تلاقى أصحابه يبدئوا يكتبوا أنه قبل ما ينتحر كان بيعمل كذا وأنا مخدتش بالى … ودى العلامات اللى هنتكلم عليها النهارده واللى لو لقيتها فى شخص أعرف إن عنده ميول إنتحارية وفى الحالة دى بيكون على عاتقك إنك تحاول تكون معاه وتساعده لو صديقك وكمان تقول للمقربين ليه عشان يحاولوا هما كمان يساعدوه… أو طبعا الأفضل أنه يزور شخص متخصص يساعده عشان لو كمان محتاج أدوية … خلينا نشوف إيه هى العلامات دى.

  1. بيفتح مواضيع عن الإنتحار

    “أنت إيه رايك فى الإنتحار؟” “هو الواحد ممكن ينتحر إزاى؟” “هو اللى بينتحر بيعمل كده ليه؟”
    كل دى أسئلة بتدل إن الشخص بدأ يفكر فى الموضوع أو الموضوع نفسه شاغل باله وعايز يتكلم فيه أو يشوف أراء الناس اللى حواليه وتحس أنه بياخد رأيهم وبيكون مستنى نصيحتهم بس بطريقة غير مباشرة.

  2. بيتخلص من ممتلكاته الغالية

    دى حاجة غريبة شوية وهى إنك بتلاقى الشخص بيتخلص من ممتلكاته الغالية وبيديها للمقربين منه أو أصحابه … يعنى يكون عنده ساعة غالية جدا وبيديها لواحد صاحبه … أو عنده لابتوب إمكانياته عالية ويديه لواحد قريبه عشان يشتغل عليه … وهكذا فى حاجاته الشخصية لانه بيحس إن ده هيساعدهم بعد ما هو يموت ويفتكروه بالخير.

  3. بيشترى مسدس

    مش كل واحد بيشترى مسدس أو سلاح بشكل عام بيكون بيفكر فى الانتحار … لكن لما يكون شخص عنده بعض العلامات اللى بنتكلم عنها … وهو مش من هواة الرماية أو تجميع الأسلحة لان دى هواية عند بعض الناس … لازم ناخد الموضوع بجدية وفى الاعتبار.

  4. مشاكل فى النوم

    العلامة دى من أسوء العلامات اللى بنتكلم عنها لانها إشارة واضحة لوجود مشكلة حتى لو الشخص مش انتحارى … وجود مشاكل فى النوم عامة سواء الشخص ده بينام عدد ساعات كبير جدا أو عنده أرق ومش بينام تقريبا ده بيكون بسبب الضغط النفسى والمشاكل الشخصية.

  5. فقد للشغف والطاقة

    الفقد للشغف والطاقة واحد من العلامات الشائعة جدا لمرضى الإكتئاب واللى بيشاركهم فيه الأشخاص اللى عندهم ميول إنتحارية … وده بيكون نتيجة لحاجتين .. أول حاجة مشاكل النوم اللى اتكلمنا عليها وده أثر عضوى بسببها .. وتانى حاجة فقد الحماس والحافز الداخلى تجاه أى حاجة ممكن تحسن من حياتهم.

  6. تكوين عادات سيئة

    بيبدأ الشخص اللى عنده الأفكار الانتحارية بتكوين عادات سيئة جديدة فى حياته .. أو بالفعل موجودة لكن لمرحلة أسوء … يعنى بياخد أدوية ومسكنات كتير جدا بطريقة مش طبيعية … شرب الكحول لو مبيشربش … ولو بيشرب هتلاقيه بيشرب بكميات أكبر بكتير من اللى بيشربها فى الطبيعى … ممكن يدخن لو مبيدخنش .. وهكذا الى اخر العادات السيئة اللى ممكن يكونها بسبب الأفكار اللى بتدور فى دماغه واللى بيكون فاكر إن العاداتت دى بتنسيه أفكاره أو بيحاول على الأقل.

  7. تغيير كبير فى الحياة الإجتماعية

    الشخص لما بتبدأ تتمكن منه الأفكار الانتحارية بيبدا الحافز بتاعه تجاه حياته الإجتماعية مع أصحابه وقرايبه يقل بصورة كبيرة جدا … خروجاته معاهم تقل … بيبدأ ينطفى شوية لما يقعد معاهم .. وهكذا لحد ما يبقى الوصول ليه صعب وخروجاته شبه معدومة.

  8. التوقف عن الهوايات

    النقطة دى بيتشارك فيها برضو مرضى الإكتئاب مع الاشخاص اللى عندهم افكار انتحارية وهى إنه بيتوقف عن هواياته اللى بيحبها … لو بيلعب رياضة معينة تنس أو كرة قدم أو أى رياضة بيتوقف عنها … لو بيحب النجارة أو الصيد أو أى هواية هتلاقيه توقف عن ممارستها بشكل كامل.

  9. الإيذاء النفسى

    دى علامة قوية جدا ولازم تاخد بالك منها وهى الإيذاء النفسى … وده بيكون بأكتر من طريقة … ممكن الـ cutting أو أنهم يجرحوا نفسهم بالسكينة فى جسمهم … أو عن طريق الحرق.
    والحاجة المضيئة الوحيدة فى الموضوع ده هو أنه بيكون علامة واضحة أنك تعرف إن الشخص ده عنده أفكار إنتحارية أو على الأقل عنده اكتئاب حاد … وفى الحالة دى لازم توديه لشخص متخصص باقصى سرعة لانه وصل لمرحلة متقدمة من المرض.

  10. سلوك جنونى

    خلاص هى مبتبقاش فارقة معاه فتلاقى مثلا سواقته للعربية مجنونة حبتين مهما كان ملتزم.

  11. لغة الجسد

    لغة الجسد مش علامة واضحة لكن بنسبة كبيرة لو الشخص عنده أفكار انتحارية بتلاقى دايما كتفه واقع … عينه قليل لما تكون باصة فى عين الشخص اللى بيكلمه … ظهره زى ما يكون عامل أتب… بطريقة ما بيبقى شكله مش مريح ومش مرتاح.

  12. وجود محاولات إنتحارية سابقة

    واحدة من أخطر العلامات هى وجود محاولات انتحارية سابقة … خصوصاً لو كان لسه بيتعالج منها وبياخد أدوية الحبوب أو الأدوية اللى بياخدها مبيكونش ليها تاثير سحرى وبتحسن نفسيته فجأة .. لكن التوقف المفاجئ عنها بيسبب حالة نفسية فى منتهى السوء وممكن يحاول محاولة انتحارية تانية.

  13. سعادة وهدوء مريب

    لو الشخص لقيت عليه علامات كتير من اللى قولناها وبعد فترة لقيته هادئ وسعيد على غير العادة بالنسبة لحالته فى الفترة الاخيرة … دى علامة خطيرة.
    ممكن جدا يكون فعلا بيتعالج وبياخد أدوية وحالته فعلا بتتحسن … لكن ممكن برضو يكون الاحتمال الاسوء ويكون عمل خطة لعملية انتحاره وبيقضى اخر ايامه فى هدوء لانه بيكون فاكر أنه لقى الحل اللى هينهى كل حاجة سيئة من وجهة نظره.

العلامات اللى اتكلمنا عليها مش كلها بيكون أصحابها عندهم أفكار انتحارية …. ومش كل واحد هتلاقى عليه علامة او 2 هتروح تكلمه وكانك الطبيب النفسى الخاص بيه … لكن الفكرة أنك تحاول تتقرب منه بطريقة بسيطة وتشوف لو فعلا هو نظرته للحياة سوداوية وتشوف تقدر تساعده ازاى لو فعلا عنده افكار انتحارية.

 

كاتب المقالة

سبارتاكوس

لا تخسر فى حربك كما خسر سبارتاكوس ولكن اصمد مثله !

Leave a Reply

Your email address will not be published. Required fields are marked *