علاج القلق الغير مبرر

علاج القلق الغير مبرر

علاج القلق الغير مبرر – الأوفرثينكينج بيحتاج حاجات كتير عشان نتخلص منها ، و الشكوك و المخاوف جزء طبيعي فى حياة اى بنى ادم و بيقابلهم فى حياته بصفة مستمرة فى مواقفه الحياتية، من الطبيعى جداً تكون قلقان عشان الإمتحان بتاعك، الفلوس اللى عليك و انت مش معاك دلوقتى عشان خاطر تسددها، والدك اللى تعبان .. كل دى حاجات طبيعية و تستدعى القلق .

لكن لما القلق و التوتر يزيد عن حده زى هل خطيبى لما قالى شكلك وحش انهارده كان يقصد ان اللبس وحش بس ولا انا شكلى كـ بنى ادمة وحش و تفضلى تربطى المواقف ببعضها .

و زى مديرك اللى قال كلمة فى الإجتماع و حسيت منها انك فقدت الثقة فى نفسك و فى شغلك و بدأت تفكر هل انا بعرف اشتغل كويس ولا وحش ؟

و صاحبك لما نزل مع باقى اصحابك من غير ما يقولولك و بدأت تفكر هل كدا هما مبقوش يحبونى و بيحاولو يبعدو عنى ؟

كدا انت دخلت فى القلق الغير مبرر و محتاج انك تبدأ تسيطر عليه .. هنقولكم على 4 حاجات تعملوهم تساعدكم فى التقليل من حدة القلق الغير مبرر .

 

1- علاج القلق الغير مبرر بيحتاج منك التواصل مع الاخرين

انك تتفاعل مع شخص بيحبك و بيخاف عليك أن كان مثلا أختك او اخوكى ، صديقتك ، زوجك او زوجتك ، الكلام مع الاخرين عن مخاوفنا بيخلي نسبة خوفنا تكون أقل، لأنك ساعتها هتتناقش و هتتكلم عن اللى بتحس بيه . مساعدة الاخرين لينا من أعظم الحاجات اللى ممكن تحصلنا عشان نطلع من مشكلة القلق الغير مبرر و المهم انه يكون شخص بيهتم بيك عشان كدا من المه

حدد الحاجات اللى بتخلى علاقاتك مش صحية :

فكر هو أنت بتتصرف أزاى لما بتكون قلقان من العلاقة اللى أنت فيها سواء علاقات مع أهلك او اصحابك او علاقة عاطفية .

هل انت لما بتكون قلقان فى العلاقات .. بتختبر شريكك ، صديقك ؟ بتفضل توجه إتهامات علطول للطرف اللى بتتعامل معاه ؟ طريقة كلامك بتكون عبارة عن شخص متعجرف فى طريقة كلامه و تصرفاهه ؟

و بمجرد ما تفكر فى ” ايه هى التصرفات اللى بعملها لما بكون قلقان فى علاقاتى بالأخرين ” ، ابدأ علطول فكر فى طريقة أفضل للتعامل مع أى مخاوف بتواجهك فى العلاقة او فى انعدام الأمان اللى بتحس بيه فى العلاقات

خد بالك ان الحل دا مش هتعرف توصله غير كمان لما تتكلم مع الطرف التانى سواء كان شريك حياتك او صديقتك او اختك و هكذا .

أبدأ اتكلم و طلع اللى جواك :

أول ما تحس أن قلقك بدأ يزيد ، اتكلم مع الناس القريبة ليك سواء صديقك – صديقتك – شريك حياتك – أحد أفراد عائلتك ، مجرد ما هتتكلم مع شخص قريب ليك وجهاً لوجه دا هيخلي قلقك و توترك بقى أقل و هتحس انه حدته أبسط من الأول .

أعرف مين المفروض تتجنبه :

وقت ما تحس بحدوث قلق غير مبرر فى علاقاتك ، ابعد عن الأشخاص اللى بيخلوك تتوتر و تقلق أكتر على سبيل المثال لو والدتك بتعانى من قلق مزمن فـ هى مش هتكون أفضل شخص تكلمه لما يحصلك موقف فيه ” قلق غير مبرر ” لان فى الحالة دى هى هتقلقك أكتر و دا طبعاً بغض النظر عن درجة قربكم ببعض .

وقت ما تتعرض لموقف فيه ” قلق غير مبرر ” أختار كويس الشخص اللى هيقدر يساعدك لكن مش الشخص اللى هيخليك قلقان أكتر ! و أسأل نفسك هل أنت عاوز تحس انك احسن ولا أسوأ بعد ما تخلص كلام مع الشخص دا ؟

 

2- أتعلم أزاى تهدى نفسك بسرعة

على الرغم ان أسرع طريقة تخليك أهدى شوية لما يحصلك ” قلق غير مبرر ” هى أنك تتكلم مع شخص قريب ليك وجهاً لوجه ، بس دا مش واقعى لانك مش هتلاقى حد موجود جمبك 24 ساعة يوميا يساعدك لما تكون قلقان و عشان كدا محتاج تتعلم بعض الأساليب اللى تخليك أقل توتراً و قلقاً عن طريق حواسك الجسدية .

البصر :

بص لأى حاجة بتخليك هادى كدا و Relax او حاجة بتخليك تضحك .. حاجة جميلة سواء منظر طبيعى ، صورة مع شخص بتحبه ، صور على الانترنت ، صورة عائلية .. أخرج و أقعد فى مكان المناظر الطبيعية فيه جميلة !

السمع :

اسمع حاجة بتخليك هادى ، قرآن او صوت بتحبه ، او أصوات طبيعية زى البحر او المطرة او صوت أوراق الشجر ، عصافير

الشم :

الشموع المعطرة ، الورد ، أقعد فى حديقة و أتنفس هواء نقى ، خد نفس عميق من مناخيرك و طلعه واحدة واحدة و هتحس انه بيطلع من بطنك ، حط نوع العطر اللى بتحبه .

التذوق :

شوف أيه اكتر حاجة بتحب تاكلها او تسربها ، استطعمها ببطئ و كلها او اشربها على مهلك و حس بحلاوتها .

اللمس :

لو عندك كلب او قطة أحضنهم ، أحضنى والدتك ، أختك ، صديقتك .. لف نفسك فى البطانية 😀 أحساس الإحتواء بيقلل من حدة الشعور بالقلق الغير مبرر :’)

الحركة :

و دى فعلاً أفضل حاجة تقدر تعملها لما تحس بتوتر و هى انك تتحرك سواء هتتمشى او هتجرى او هتنط و يا سلام لو انت بتروح/ى جيم .. هيكون كويس جداً هيخليكم تطلعو التوتر و الطاعة السلبية و بالنسبة للبنات اللى عندها قلق غير مبرر .. جربو ترقصو هتحسو انكم أحسن 😀

3- التمارين و الإسترخاء

التمارين عبارة عن علاج طبيعى و مضاد للقلق و خصوصاُ ” القلق الغير مبرر ” و بيخفف من حدة التوتر و بيقلل هيرومونات الفزع و الخوف الموجودة فى الجسم و بيزود الهيرمونات الفعالة المعاكسة للقلق زى السيروتونين و الاندروفين و دا اللى بيخلينا نحس بشعور جيد و حالة نفسية أفضل !

أفضل طريقة لمحاربة قلقك وتوترك هو ” ذهنك ” عشان كدا لازم تغذيه بالحاجات اللى هتخليه يحارب القلق و التوتر

ممكن و انت بتعمل تمارين عادى تفضل تفكر فى حاجات بتخليك قلقان و متوتر ، فـ النقطة هنا انك تفكر فى حاجات تانية تخليك مش قلقان ، زى مثلاً لو أنت بتجرى .. حس بالهواء و هو بيخبط في وشك و فى جسمك ، حس بضربة رجلك على الأرض و انت بتجرى ، ركز فى إيقاع تنفسك

كل الحاجات دى هتقلل من حدة قلقك الغير مبرر .

و طبعاً جلسات الـ Meditation و اليوجا بتأثر على تحسين حالتك المزاجية

 

4- العلاج السلوكى المعرفى

لو جربت تنفذ الخطوات اللى فوق و لقيت انك مازلت بتعانى من القلق الغير مبرر بحدة ، فى الوقت دا بتحتاج أنك تروح لطبيب نفسى ، بس خلى بالك أن حتى بوجود الطبيب النفسى لازم تطبق برضو الخطوات اللى فوق عشان تقدر تلاقى نتيجة و تحس ان حدة قلقك الغير مبرر بدأت تقل او تختفى ! و على حسب حالتك الدكتور بيقرر ان كنت هتاخد دواء يقلل من حدة

و العلاج السلوكى المعرفى عبارة عن ” جروب ثيرابى- Group therapy ” و دى بتعتمد على تغيير الأفكار و هنا هتبدأ تحس ان الأفكار السلبية بتتغير لبعض الأفكار الإيجابية .

و كدا نبقى خلصنا شرح طرق العلاج من القلق الغير مبرر 

 

و دلوقتى أحكيلنا عن تجربتك مع القلق الغير مبرر

 

 


مواضيع متعلقة :

القلق الغير مبرر و الاوفرثينكينج لكل شخص بيقلق من غير سبب

كاتب المقالة

ياسمين سمير