الوسواس القهري، أنواعه وكيفية التعامل معه

الصورة دي عدت على كذا حد مننا تحت عنوان “صاحب المحل ده عنده وسواس قهري” 😀

 

واصحابنا البرنسين اوي يعني كان ردهم “لا على فكرة في ازازتين أحمر على اليمين  محطوطين مش في مكانهم” الراجل ده معندوش وسواس قهري ولا حاجة !

من منطلق هذا ما وجدنا عليه أباؤنا، و الأفلام اللي بوظت عقولنا 😀 فاحنا عارفين ان الوسواس ده الشخص الي بيحتاج كل حاجة محطوطة في مكانها بالظبط، او الشخص اللي عنده هوس النظافة و بيغسل ايده كل خمس دقايق ..

الكلام ده مش هنقول عليه غلط، بس هو مش بالسطحية .. نفهم مع بعض الوسواس القهري او الـOCD زي ما بنشوف اسمه علطول “Obsessive Compulsive Disorder” ..

“الشخص اللي عنده وسواس بيكون في حالة واعية انه بيعمل تصرف غريب، و ان تصرفه مش منطقي، بس مش عارف يبطله ..”

يعني هو عارف ان ايده نضيفة، بس محتاج يغسلها برده، هو عارف ان البوتاجاز قفله كويس بس هيرجع طريق السفر كله تاني عشان يتاكد انه قافل البوتاجاز !

باختصار “تصرفات وأفكار غير مبررة وغير منطقية ، لا يستطيع التوقف عنها، رغم معرفته بعدم منطقيتها”

بس الموضوع مش بينحصر في نوع واحد ..

في انواع مختلفة للوسواس القهري:

1- المشككين checkers

قفلت البوتاجاز ولا لا، قفلت النور و لا لا، قفلت الباب في المفتاح و لا لا، الموضوع ممكن يوصل لان ابني هو ابني ولا اتبدل في المستشفى ! الشك في كل فعل صغيرًا كان او كبير

2- المنظفين washers & cleaners

الشخص اللي بيغسل ايده كل خمس دقايق، وكل ما يغسل ايده يغسلها تاني، قد يكون غسيل اليد موقف بسيط رغم أنه بيستهلك وقت ومجهود كتير طول اليوم و توتر، بس المشكلة اكبر كمان لما يقعد 4 ساعات بيستحمي وحاسس انه مستحماش كويس، او لما تكون ماشية في الشارع وفي كلب في الشارع المقابل فتروح تحط كل هدومها و الشنطة و الجزمة في الغسيل، رغم سؤالها لينا هل الكلب عدا من جمبها، و الكلب اصلا ماشي في شارع تاني خالص !

3- المكررين Repeaters

الحركة لازم تتعمل كذا مرة عشان يتأكد، يعني قفل الباب، يفتحه و يقفله تاني عشان يتأكد انه اتقفل، يفتحه و يقفله تاني ، عشان يتأكد برده، و هكذا مع مواقف تانية كتير بيكرر نفس الفعل و مرة و اتنين و تلاتة و اكتر، لمجرد التأكد ان مفيش اي خطر

4- المنظمين Orders

الي بيحتاجو كل حاجة تكون في مكانها مظبوط ! طالما حرّك دي خمسة خطوات فلازم دي تتحرك خمس خطوات زيهم، كل حاجة لازم تبقى سيمترية ” اليمين اد الشمال ” والا دماغهم مش هتستحمل، و مش هيعرفو يبطلو تفكير، و زي ما قلنا رغم معرفتهم ان دي حاجة مش منطقية

5- المقتنيين Hoarders

ميقدرش يستغنى عن اي حاجة يمكن يعوزها ! اه بالظبط كده ميقدرش يرمي اي حاجة ، دايما شاكك اني هحتاج ده ، رغم انه بقاله سنين ميعرفش ايه ده، بس هو اكيد شئ مهم

6- المفكرين Thinking Ritualized

في فكرة مسيطرة على دماغه مش عارف يتخلص منها، زي انا هيجيلي زهايمر لما يكبر، فيقعد كل يوم يفتكر كل الذكريات البسيطة عشان حاسس انه هيجيله زهايمر، رغم ان الحاجات دي سهل جدا تنساهاا و طبيعي جدا تتنسي، بس هو لو نساها يفتكر انه جاله زهايمر

طب هل هو مبسوط بالوضع ده، و هل الوضع ده قابل للسخرية اننا نهزر على بعض “بس يا بني انت عندك وسواس ولا ايه”

الحقيقة الموضوع ده مؤلم جدا جدا ! للمريض و للي حوالين المريض، عشان مش منطقي ترجع مع حد طريق اسكندرية الصحراوي كله عشان تتاكد ان البوتاجاز طلع مطفي فعلا، او انها تبقى ست ولدت من 5 سنين و كل يوم عندها وسوسة ان ابنها يكون اتبدل في المستشفى لما اتولد، أو ان كل حاجة تبقى اد بعضها، الخطوات بالرجلين اليمين اد الشمال، الاستحمام ياخد 4 ساعات كل يوم، الورقة اللي بقالها عشر سنين و مترمتش !

الموضوع المؤلم فيه أزيد، ان المريض عارف ان افعاله مش منطقية، ، و واعي بكده جدا، بس مش عارفة يتحكم في تفكيره نهائي ، ووالمؤلم للي حواليه انهم بيتعبو و بيزهقو منه، لو استحملو مرة و اتنين و سنة من الافعال دي مش هيستحملو سنين ، فيبدأ المريض يعتزل الناس عشان محدش فاهمه، و يبدأ الموضوع يكبر بدل ما يقل، و حتى ممكن يوصل انه ييأس انه يكون في علاج لحالته و يفضل كده !

في علاج للوسواس القهري ، اه في ..

والأدوية هنا بتلعب الدور الأساسي في العلاج، يليها تعاون الأسرة، انها تطمن المريض اول باول وتقنعه بالصح من الغلط، و تصبر عليه ..

والعلاج مش بيتم في يوم و ليلة، للاسف بيحتاج وقت طويل، و بيحتاج معاه صبر من الحلقة الثلاثية، المريض و الطبيب و الأسرة .. بس مبيتمش العلاج و المريض بيواجه ضغوط بين اهله، زي انهم يمنعوه يغسل ايده لمدة ساعة، او يعنفوه على الافكار اللي بتجيله او منعه انه يمارس اي طقوس بتهديه

لو حاسس انك بتعمل تصرفات غير منطقية زي دي بطريقة ملحوظة، انت محتاج ترجع لدكتور نفسي فعلا

لو تعرف حد بيمر بالحالة دي، بلاش تكون ضغط زائد عليه بالسخرية او بالمنع

ملحوظة:

بعد ما تقرأ المقال ده لازم ترجع تقرأ المقال ده عشان دماغك متسوحكش 😀

bit.ly/medical_Student

كاتب المقالة

هيبنوس

كلامي لا يعجب أحد .. وكذلك فكري دائما منبوذ جدا .. انا اعلم أن بهم الكثير من الخلل ولكني لا أملك غيرهما فلن أخاطر بفقدهما ابدا . .

Leave a Reply

Your email address will not be published. Required fields are marked *