إزاي الإباحية بتدمر حياتك ؟

العادة السرية و الإباحية

الافلام الإباحية وإدمان مشاهدتها هى عادة من أكتر العادات اللى بيحاول يواجهها المجتمعات، ومش بس المجتمع المصرى أو المجتمع الشرقى كمان، لا فى كمان مجتمعات غربية بتحاول تواجه المواقع الإباحية لأسباب كتير ممكن نتكلم عنها قدام بالتفصيل وإزاى ده بيأثر على البنية المجتمعية نفسها.

لكن إحنا هنا فى المقال ده مش هنتكلم عن المواقع الإباحية نفسها غير فى نقطة واحدة بس، لكن فى باقى المقالة هنتكلم من الناحية النفسية، وإزاى المواقع الإباحية واللى بطبيعة الحال بيصاحبها “الإستمناء” أو “العادة السرية” بيدمروا حياتك.

 

خلينا الأول نتكلم فى حاجة مهمة وهى ليه أصلا المراهق أو الشخص العادي بيتفرج على الأفلام الإباحية ؟ إيه هو العامل النفسى اللى بتوفرهوله النوعية دى من الأفلام بحيث تجذبه.

وفى الحقيقة هما عاملين رئيسيين:

العامل الأول: التنوع

المواقع الإباحية هي عالم إباحى افتراضي متكامل، وعشان يضمن تواجدك باستمرار لازم ميحسسكش بالزهق أو الملل، عشان كده بيوفرلك التنوع فى كل حاجة بتتفرج عليها من أول نوع الأفلام نفسها لتنوع الممثلين نفسهم، كل أنواع الأفلام وأى هوس جنسى ممكن تتخيله أو حتى متتخيلوش هتلاقيه فى الأفلام دى.

العامل الثانى: الـ Purity

وهنا المقصود بيه أنه بيوفرلك العملية الجنسية المثالية من جانبها الإيجابى بس، وده مش حقيقى لإن العلاقة بين الزوجين بتختلف من وقت للتانى على حسب الوقت وعلى حسب التغيرات النفسية والجسدية اللى بتطرأ على الزوج والزوجة.

نقدر نقول إن العاملين دول هما اللى بيوفروا العامل النفسى لأى شخص بيزور المواقع الإباحية، لحد هنا مفيش مشكلة … ومش هندخل فى جدل معروف وهو “يا ترى المواقع الإباحية والإستمناء مضرين للإنسان ولا مفيدين؟”.

ده جدل كبير جدا لكن زى ما إحنا قولنا هيكون كلامنا على التأثير من الناحية النفسية بس.

 

طيب إحنا كده عرفنا “ليه الشخص بيدخل على المواقع الإباحية واللى بيصاحبها الإستمناء”، إزاى بقى الكلام ده بيدمر حياتك؟

لما بتخلص يوم شغل طويل ومرهق وتيجى بعدها تروح مطعم وتطلب أكل وتاكل بتحس براحة ومتعة بالأكل ده لأنه جه بعد يوم طويل.

لما بيكون عندك امتحان فأنت بتذاكر ولما بتجيب درجة كويسة أو تنجح فى المادة بتفرح وتنبسط.

لما بتترقى فى شغلك بعد فترة كبيرة من الشغل الكتير والمجهود اللى بتبذله عشان تثبت نفسك فى الشغل برضو بتنبسط.

لما بتحس برغبة معينة وتجيب لاب توب وتفتح موقع إباحى وتستمنى برضو بتستمتع.

لما بيحصلك كل الحاجات اللى فوق دى بيحصلك عملية استمتاع، أو زى ما بيقولوا كده Rewards اللى هو المتعة بتاعة التعب اللى عملته، فالفكرة فى المتعة أو الـ reward دى هى أنها بتكون جايزة لمجهود أنت بتعمله.

بتنبسط بالأكل بعد يوم شغل طويل، بتنبسط بالترقية بعد شغل كتير وبعد ما تثبت نفسك لأنه بيكون جايزة على تعبك، على عكس الإستمناء والأفلام الإباحية واللى بتكون متعة وجايزة من غير مجهود .. كل اللى بتعمله هو أنك بتفتح الموقع وتتفرج من غير ما تبذل أى مجهود.

على عكس الطبيعى وهو إنك لما تحب تمارس الجنس بتخرج وبتختلط بالناس وبتشوف حد بتعجب بيه وبعد فترة سواء عن طريق الجواز أو غيره بتمارسوا الجنس.

وهنا مربط الفرس إنك بتتعود على المتعة والـ Reward دى من غير أى مجهود، تخيل لو كنت تقدر تترقى فى شغلك عن طريق أنك تدخل على موقع، أو أنك تخس عن طريق حبوب تخسيس من غير ما تمشى على أى نظام غذائى أو حاجة (ممكن يكون موضوع الحبوب ده فعلا موجود ولكن أضراره الصحية مميتة)، لو هتاخد امتياز فى مادة من غير ما تسهر كل يوم عشان تذاكر عن طريق إنك تدوس على زرار أكيد مش هتذاكر.

فى إحصائية اتعملت على الناس اللى بتشاهد الأفلام الإباحية وبتمارس العادة السرية كان دايما عندهم انخفاض فى معدل الحماس والطاقة عن الناس اللى مش بتتفرج على المواقع الإباحية أو بتمارس العادة السرية سواء ولاد أو بنات.

الموضوع كله إن مخك بيتبرمج أنه ممكن يحصل على المتعة أو الـ Rewards دى من غير أى مجهود، والموضوع مش بيتوقف على المواقع الإباحية أو الجنس بصفة خاصة، لا ده بيكمل فى حياتك الشخصية والعملية وبيبقى صعب توقفه لإنك خلاص اتعودت، وكمان بياثر على حماسك وطاقتك ونشاطك.

طيب ما فى ناس بتتفرج على الأفلام الإباحية وبتمارس العادة السرية وناجحة ومش كسولة عادى، ليه مش بيحصلهم كده؟

ده شئ طبيعى، مش لازم كل الناس تكون كده … لكن المعظم هتلاقيه بيتاثر بالسلب بطريقة واضحة، لو بصيت على 10 أشخاص تعرفهم بينطبق عليهم الكلام ده ممكن تلاقى 2 منهم بس هما اللى مستقرين نفسيا ومش بيتاثروا .. لكن باقى الـ 8 أشخاص بيحصلهم كل الآثار السلبية اللى اتكلمنا عليها.

وحاجة كمان مهمة الموضوع مش مرتبط بالأفلام الإباحية بس، الفكرة فى الـ Reward اللى بتحصل عليها وبتبرمج مخك زى ما اتكلمنا على الـ Effortless Reward اللى هى الجايزة اللى مبتبذلش عليها مجهود، هتلاقى ده بينطبق برضو على الألعاب أو الـ Video Games والخمرة و المخدرات.

حاول تبعد نفسك دايما عن المتعة الزائفة واللى بتدمر حياتك وأنت مش واخد بالك، والأفضل كمان أنك تستشير طبيب متخصص لو أنت مدمن حاجة من دول ومتستهينش بالأمر.

كاتب المقالة

أحمد جاد

Leave a Reply

Your email address will not be published. Required fields are marked *