إزاى تعرف إن مديرك سيكوباتى ؟

4 علامات تدل إن مديرك سيكوباتى

 

الشغل حاجة مهمة فى حياتنا ولا يمكن الإستغناء عنها، لأنها المصدر الأساسى لسد احتياجات الحياة .. لكن يا ترى الفلوس اللى بناخدها من الشغل بتكون مقابل الشغل اللى بنعمله بس ولا كمان بسبب الأذى النفسى اللى بيسببه المدير “السيكوباتى”.

خلينا نتفق إن المديرين المحترمين فى الشغل مش كتير خصوصاً لو أنت فى شركة لا تحافظ على حقوق الموظفين وبيئة العمل غير صحية … لكن خلينا نقول نقطة فى غاية الأهمية.

فى فرق كبير بين المدير اللى نقدر نقول عليه سيكوباتى والمدير السئ أو العنيف أو أى صفة سيئة لكن موصلش لمرحلة السيكوباتية.

من بين كل 100 شخص فى واحد منهم سيكوباتى … وللاسف إحتمالية زيادة الرقم فى أماكن العمل كبيرة.

فى دراسة اتعملت بتقول إن 4% من أصحاب الشركات “CEOs” للاسف سيكوباتيين … والنسبة تقريباً بتوصل للضعف بين المديرين ودى تقريبا نفس نسبة المرضى النفسيين الموجودين بين المجرمين فى السجون. 

طبعا ده شئ بشع جدا لكن نتكلم على نقطة مهمة وهى إن ريادة الأعمال مش شئ سهل .. وللاسف بيكون جزء منها إنك تجنب جياتك الإجتماعية وأصحابك وعيلتك عشان تقدر تشتغل كتير جدا عشان تقدر تقوم المشروع أو البيزنس بتاعك. ولما الشخص رائد الأعمال ده بيشغل ناس معاه بيكون عايز يخليهم قلبهم عالشغل وبيشتغلوا كتير زيه لانه بالنسباله لازم كله يسخر مجهوده عشان المشروع والبيزنس ده ينجح لانه بالنسباله ده حياته كلها.

وده بيسبب قتل الحياة الإجتماعية عند الموظفين دول وبالتالى نسبة عالية من الـ Turn Over “يعنى الموظفين يسيبوا الشركة ويمشوا”.

الكلام ده بيخلى التفرقة بين المدير اللى فعلا سيكوباتى والمدير الصعب فى التعامل أو العنيف فى منتهى الصعوبة فى ظل بيئة عمل غير مستقرة زى دى، لكن من حسن الحظ إن فى علامات بيعملها معظم المديرين السيكوباتيين سواء فى الشغل أو طريقته فى الكلام فى الشات والايميلات بتساعدنا نعرفه. 

  1. العداء

    المدير السيكوباتى بيكون عنده مشكلة فى العاطفة … عجز عاطفى غير مبرر وده بيخلى أسلوبه عدائى جدا وتعبير القلق ده مش موجود فى قاموسه … معندوش تعاطف تجاه أى شخص فى بيئة العمل. طريقة كلامه بتحمل الكثير من السلبية والعدائية بغض النظر عن شخصية البنى آدم اللى بيكلمه.
    يعنى هتلاقيه بيكلم صاحبه زى ما بيكلم زميله فى الشغل زى بالظبط ما بيتكلم على السوشال ميديا … والموضوع ده حاجة مريبة جدا.

  2. لغة معقدة

    العجز العاطفى اللى قلنا أنه موجود فى المدير السيكوباتى ده بيخليه صعب أنه يتفهم. يعنى تلاقى إن الناس بتواجه صعوبة فى فهم كلامه … وده بيوضح جدا جدا فى الايميلات اللى بيتبعتها أو طريقة التواصل الكتابية بشكل زى الشات كمان. هتلاقيه بيستخدم لغة صعبة فى وسط الكلام وبيضيف عبارات غريبة على الايميل.

  3. الكدب

    طبعا الحقيقة الواضحة والصريحة أنننا كلنا كدابين … ده عادى وكل الناس بتكدب ده مش شئ جديد ومش شئ خاص بالمدير السيكوباتى.
    لكن الغريب أو المختلف هنا هو سبب الكدب … يعنى الناس فى العموم بتكدب عشان تحمى نفسها من حاجة معينة عشان غلطة ارتكبوها .. أو عشان خايفين على مشاعر شخص معين ومش عايزينه يتضايق من شئ معين … لكن المدير السيكوباتى بيكدب من أجل الكدب .. مفيش سبب معين أو واضح عشان يكدب … فكرة أنه يتلاعب بالأشخاص ويقولوهم أخبار أو حكايات مزيفة بتخليه سعيد … خداع الناس بالنسباله متعة.

  4. الأنانية

    الحافز اللى بيقود المدير السيكوباتى هو إحتياجاتهم … لو اتكلمت معاهم فى العموم هتلاقى الفلوس والأكل واحيانا كمان الجنس واخد 90% من وقت المحادثة دى.
    حياتهم كلها بتدور فى مود البقاء على قيد الحياة وده بيخليهم دايما فى أدنى درجات هرم ماسلو للاحتياجات الإنسانية ومش قادرين يطلعوا ولو حتى درجة واحدة لفوق.

دى علامات مهمة جدا لو أخدنا بالنا منها هنعرف نفرق بين المدير السيكوباتى والمدير العصبى أو السئ أو العنيف وغيرهم … اه هما طبعا مش أسوياء والأفضل أننا منتعاملش معاهم أو نشوف مكان صحى تانى لكن مش بنفس سوء المدير السيكوباتى اللى هيخلى حياتك المهنية لعنة.

لكن كمان فى نقطة محتاجين ناخد بالنا منها .. وهى إن المدير السيكوباتى دايما بيدور على ناس يحموه فى نطاق بيئة العمل. ناس تحميه وتدافع عنه وتنقله أخبار الشغل والكلام اللى بيتقال عليه .. ممكن يكونوا قرايبه ويشغلهم معاكم … ممكن يكون حتى المستثمرين اللى فى الشركة اللى بيسكتوا عن أفعاله عشان مستنيين حاجة معينة تحصل فى الشركة عشان يقدروا ساعتها يبيعوا وياخدوا أكبر نسبة ربح … وأوقات كتير بيبقوا الـ HR اللى فى الشركة.

وللاسف فى الأوقات دى دايما الأشخاص اللى بيكون عندهم الشخصية والصلاحيات أنهم ممكن يعملوا حاجة صح ممكن توقف الوضع ده من أنه يتدهور مبيعملوش كده .. وده بيخلى الوضع يبقى أسوء.

لكن فى نفس الوقت الحماة دول مش فى وضع آمن على الإطلاق … الفكرة كلها أنهم فى صفه .. لكن لما يججى الوقت اللى يحاولوا يسكتوا أو يبطلوا يساعدوه بينتقلوا فورا على الجانب الآخر بالنسباله .. وبيحول كل السخط والعداء تجاههم لحد ما ينتهز أى فرصة ويطردهم من الشركة.

مش حابين نقول إن فى ناس كتير بتفضل تشتغل معاهم على أمل الوضع يكون أفضل ويتحسن لكن للاسف مش ده الشئ الصح … الشئ الصح إنك تستوعب إن ده شغل وبس مش أكتر ولا أقل … وسيلة عشان تسد إحتياجاتك وتدور على مكان تانى يكون البيئة بتاعته صالحة للشغل وصحى أكتر … مش مكان بيأثر بالسلب على صحتك النفسية ومخلى حياتك المهنية جحيم.

مصادر

https://link.springer.com/article/10.1007/s10551-015-2908-6

كاتب المقالة

سبارتاكوس

لا تخسر فى حربك كما خسر سبارتاكوس ولكن اصمد مثله !

Leave a Reply

Your email address will not be published. Required fields are marked *